«កាព្យប្រវត្តិពង្សក្សត្រខ្មែរ» បទ អ័ស្ត-ស័ប្ត ដែលរៀបរៀងដោយលោកស្រីបណ្ឌិត ជា វណ្ណី ជាស្នាដៃថ្មីមួយទៀតសម្រាប់អ្នកចូលចិត្តការអានសៀវភៅនៅដំណាច់ឆ្នាំ២០១៩នេះ។
លោកស្រីបណ្ឌិត ជា វណ្ណី បានឱ្យដឹងថា ប្រទេសកម្ពុជាជាប្រទេសមួយដែលមានប្រវត្តិសាស្រ្តរបស់ខ្លួនជាង២០០០ឆ្នាំមកហើយ។ ក្នុងនាមជាកូនខ្មែរ យើងត្រូវនាំគ្នាខិតខំប្រឹងប្រែងរៀនសូត្រឱ្យបានចេះចងចាំច្បាស់លាស់នូវប្រវត្តិសាស្ត្ររបស់ខ្លួន ដើម្បីទុកយកមកស្រាវជ្រាវ រិះគិតថ្លឹងថ្លែងពិចារណា ដោយដកស្រង់យកបទពិសោធន៍មកធ្វើជាមេរៀនសម្រាប់បច្ចុប្បន្នកាលផង និងសម្រាប់អនាគតកាលផង។ លោកស្រីបន្តថា បច្ចុប្បន្ននេះ អត្ថបទប្រវត្តិសាស្រ្តមានសរសេររៀបរៀងជាទូទៅជាអត្ថបទពាក្យរាយ ពុំទាន់ឃើញមានអ្នកចងក្រងជាអត្ថបទពាក្យកាព្យនៅឡើយ និងម្យ៉ាងដោយសារតែលោកស្រីមាននិស្ស័យស្រឡាញ់ពេញចិត្តខាងកំណាព្យកាព្យឃ្លោងផងនោះ ក៏សាកល្បងសរសេរប្រវត្តិសាស្រ្តខ្មែរដោយសង្ខេបដោយផ្អែកលើអត្ថបទប្រវត្តិសាស្រ្តផ្សេងៗ ជាពាក្យកាព្យ ទុកគ្រាន់ជាការបំពេញនូវអ្វីដែលយើងមិនទាន់មាន និងសម្រាប់អ្នកចង់អានប្រវត្តិសាស្រ្តជាកំណាព្យផងដែរ។
លោកស្រីលើកឡើងថា ការខិតខំប្រឹងប្រែង
តាក់តែងចងក្រងនិពន្ធកំណាព្យ «កាព្យប្រវត្តិពង្សក្សត្រខ្មែរ» ជាបទ អ័ស្ត-ស័ប្តឡើងគឺគ្មានបំណងនឹងចាត់ទុកស្នាដៃនេះ
ជាសៀវភៅប្រវត្ដិសាស្ដ្រល្អត្រឹមត្រូវដែលត្រូវជំនួសឯកសារផ្សេងឯទៀតនោះទេ។ លោកស្រីបានគូសបញ្ជាក់ថា គោលបំណង និងទិសដៅធំរបស់លោកស្រីគឺចង់ធ្វើដូចម្ដេចចងក្រងឯកសារប្រវត្ដិសាស្ដ្រខ្មែរ
ជាកំណាព្យដែលមានលក្ខណៈសង្ខេបទុកជូនដល់ប្រជាពលរដ្ឋខ្មែរ បានអាន ដើម្បីឱ្យងាយចេះចងចាំ
និងចូលរួមចំណែកលើកស្ទួយវិស័យកំណាព្យខ្មែរតែប៉ុណ្ណោះ៕